اشمعنى أنا بالذات ؟؟

أصحابي
اللي كانوا قريبين مني
اتفرقوا ع الدروب
ورجعوا ناس تانيين
بيتكلموا بلغات غريبة
بين كل كلمة والتانية
دينار أو دولار !!
وانا لسه قاعد ع المصطبة
قدام بيتنا القديم
اللي اتشرخت حيطانه
من كتر شيل الهموم والذكريات
ولسه بااكتب شعر
***
لحد إمته
ح افضل قاعد كده
تشدني الأيام بحبل ليف مكسور
وتمرر بين ضلوعي ذكريات
قرّبت أنساها :
ــ صورة باهتة لبنت حبيتها زمان
وهي ماحبتنيش
ــ شجرة التوت اللي مايلة
في طريق المدرسة الابتدائي
واللي قطعوها يوم ما سفلتوا السّكة
ــ حصان الطين .. وزمّارات البوص
يااااااه
قاعد هنا بش مش فاكر
من قد إيه بالظبط ؟
على شط صحرا
آخر حدودها الريح ..
كل شوية أرمي صنّارتي
ودايما موج الرمال عالي
ولما غمزت .. سحبتها
طلعت بحلم جريح
***
إمتى يا شجر التوت
ح تنضّف أراضي الوحدة
م الكوابيس
وارجع أقابل حبيبتي زي زمان
جمب الطاحونة القديمة
ولما نحضن بعض
تنزل دموع القمر
على عتمة الشارع
اشمعنى انا
مش عارف أعدي الطريق وحدي
واشمعنى أرض الحلم
بتخضّر قوام بالشوك !!
مدد
يا شجرة الصبّــــار .