حرب القيام

يا بلدما خايفين عليكي للغرب يفضح عنيكي

دول فهموا مدت إيديكي شحاته مش للسلام

وانتي اللي مليانه عينك وإن جُعْتي ربك يعينك

ف الحرب دايماً داعينك ف السلم ينووا الخصام

عاوزينا نعمل حسابهم (وديبنا) يخدم(كلابهم ) .

ونزغرتوا ان حام غرابهم ونزفه على جوز حمام

وانتي اللي أهلك سيادهم والفرد فيكي بعددهم

كيف تبقى بلدك بلدهم ونجاوروا ولد الحرام

ليه تخصخصي الخاص بينا وتملكي خصومنا فينا

دول حتى سُنِّة نبينا نسبوها للعم سام

خلقوا اختلاف الأئمة وتبنا آخرتها يامّه

دي الحرب برانيط وعمة ناطحة سحاب والخيام

دول سموا نخوة عيالنا شايفينا من فوق ( جمالنا )

فاتنين صليبنا بهلالنا والبابا كره الإمام

دول صفوا دم الطهاره يابلدنا إيه العبارة

دا المسلمين والنصارى في الكشح فلتوا الزمام

ما تصدقيش إشاعاتهم أمريكا تظبط ساعاتهم

كلب إسرائلهم بعتهم ييجوا ف ميعادهم تمام

محناش أراضي لميعادهم دا المولى بالنار وعدهم

لازم نحارب يهودهم ونصلي حرب القيام



************