لمَّا يكسرني الكلام ..

لمَّا يكسرني الكلام ..

تحيه إلي الشجعان والرجال البواسل في غزه .

*
لمَّا يكسرني الكلام
وانتِهِي للصمت ،
ألقَى الصمت يصرخ ،
يصرخْ فِيَّا أصرخْ ليه جبان ..؟
ليه تخاف وانته الحقيقه ..!!
إنته وحدك بس موال النهار ..
وكل تاني أصله زيف ،
ذى طيف ..طيف يعدِّي
موج على شطك وغار ..
**
لمَّا يكسرني الكلام
وانتِهِي للصمت،
ألقَى الصمت يصرخ ،
أصرخ بعلو الصوت واتحدى الآلم .
أصرخ ولاتنحني واقف ولاتنتني .
نبض الزمن ف القلب دقاته .
نبض الزمن ف العمر ساعاته .
وأحفر باسم الله ،
أنا الفارس .. أنا الأمَّه .. أنا الثوار .
وأنا الأرض اللي جواها
حشى كبدي ، عضام جدي
وبتنبت رجال أحرار .
***
لمَّا يكسرني الكلام
وانتِهِي للصمت،
ألقَى الصمت يصرخ ،
أصرخ بعلو الصوت وقول قولك .
ولا تسكت على قبري وتبكيني .
ذليل باهت ملكش خيال يواسيني .
قطعت لساني ورميته عشان مايقول
والا ينافق ولاد الكلب .
قطعت لساني ورميته عشان شايف
كلامهم كدب .
أنا الصمت اللي بيعلِّم ..
أنا عايش وبتألِّم ..
من الحرف اللي قال عنِّي .
من الحرف اللي كان منِّي .
رماني بعِهْرُه وبعَجْزُه .
رماني بضعفه وخيانته .
رماني بدمِّي واتفرَّجْ ،
على ولدي على بنتي ،
على أهلي على مرتي .
... عليَّا كمان .
بنتدبَّح ونتقطَّع وننزف جوع ،
والا بنشكي .
... غريب يازمان .
دا حرف زرعته ينصفني
وربّيته وكبَّرته ولمَّا لملم الكلمه ،
نطقها وخان .
****
لمَّا يكسرني الكلام
وانتِهِي للصمت ،
ألقَى الصمت يصرخ ،
أنا الصمت اللي متكوِّم سنين عاميه
ف قلب الطين .
نزفت الدمّْ ولقيته بيروي الطين .
وعضم عيالي من كتره
زرع فدادين .
وأهو نبِّت وبيقاوم .
زرعت العضم بدموعي .
زرعتو وحسبي ع الظالم .
وأهو نبِّت دراع أقوى ،
من الخوف اللي جوه الحى .
ف أيه رايح ومين باقي
وايه لسَّه بهمُّو جى .
زرعتو وكنت متأكد
هيكبر نصري ويقاوم .
*****
لمَّا يكسرني الكلام
وانتِهِي للصمت ،
ألقَى الصمت يصرخ ،
أنا الصمت اللي مايسلِّم
والا هقبل واستسلم .
أنا فلسطيني ومقاوم .
وأنا العربي اللي مايساوم .
أنا الوطن اللي حَبّْ الرمل
تسمع نزفه آه وآنين .
أنا غزَّه وأنايافا وأنا حيفا
وأهل جنين ...وبنقاوم .
أنا الولد الشهيد جِدُّه
وأهله انقتلوا وانطردوا .
وأنا الولد اللي سجنوني .
وسلبوا أرضي وباعوني ..
وبيقاوم ....
ويتحدى .
أنا الفجر اللي جاى شايل
جبال الصمت بيقاوم .
أنا بصرخ بعلو الصوت
ومش هسكت أنا مقاوم .
أنافلسطيني ياعالم .
لازم تسمعني ياظالم .
أنا صابر على ظلمك
وهصمد أد ماعقلك ، هيتخيِّلْ ..
وينسى العدل ويميِّل ..
******
لمَّا يكسرني الكلام
وانتِهِي للصمت ،
ألقَى الصمت يصرخ ،
يصرخ فيَّا أصرُخْ .
أدي أرضي
وأدي طيني
ومش هتخلَّى عن ذره .
وأنا راجع
مكنش اليوم يكون بكره .
لكن هرجع ف يوم منصور .
لأن الشمس عرفاني .
ودي أرضي اللي ولداني .
وأنا ابن النور .
... معز ..09/01/19