.. إنسان ..

.. إنسان ..
بقول الشعر ياعمِّي ،
وأخط حروفه من دمِّي .
لا حد سمعني ونجدني ،
واللا خفف ف يوم همِّي .
أنا الواحد ،
وأنا الاتنين ،
وأنا الناس اللي مش عايشين .
بتكسرنا ليالي الجوع
وتكوينا هموم الدين .
غلابه وعمرنا عريان ،
عرايا الحلم ليه نسأل ؟وليه نحلم !!
دا حتى الغُلب مستكتر
علينا الحلم قام قاللي بلاش تفهم !!
لأنك هُنت في عينك
وخفت وخفت لمَّا الخوف ،
بنى لو قصور على جلدك .
وقال ياجبان ، بلاش تصرخ
بلاش تبكي ، كفايه هوان .
وأنا بنده ...
ياعالم تاني مش عارفه
أنا إنسان .
وأنا وأنتو وكل الخلق ذيي كمان .
ولاد آدم ،وآدم أصله كان إنسان .
وعمرو ماكان ف يوم ظالم
واللا حيوان .
واللا أتالِّه واللا إتكبَّر على إنسان .
ياضل الأرض بتضلل علينا بأيه
بنار حافيه بتشوينا.
وصهد الذل يلفحنا ،
حرق ف رموشنا عزتنا،
وأحلامنا ، كرامتنا ، أمانينا.
سكن ف صدورنا
مش عارف ..أنا للذل مخلوق
واللا الذل أوطاني .
بئيت بكره دروب عمري
ونفسي الدنيا تنساني .
وتديني صكوك موتي
وانا ارحل كفايه تعبت
من ذلي وحرماني .
أنا ياخوانا إنسان ،
أبسط منه مش هتشوف .
حياتي كلها كلمه ،
أنا الأعمى ونفسي أشوف .
أشوف الشمس ياصاحبي
يهل الصبح وتنور .
أشوف الأرض وحبيبتي
وأشم الزهر والعنبر .
أشوفني ذى كل الناس
كتير طلبي ..؟
وليه انداس ..!!
أنا راضي بلقمة عيش ،
وحتى غموسها بردو مفيش .
وأنا راضي بلبس الخيش ،
ونعل بسيط وماتقوليش .
أطاطي مصلحه عليا
وده ظابط وده باشا
ودا المستثنى م العِليَه .
ودول طهره بنات إبليس
ودول برره بعجل أبيس .
ودول من دول على دول
داسوني وطبعوا الذل في خدي
بجبروتهم وآسوتهم ،
وخلوني كرهت أعيش .
وباعوا أد ماباعوا
وظلموا أد ماظلموا .
واللا همه ف يوم شبعوا
واللا عن غيهم رجعوا .
وحاكموا الحلم في حلمي
ياناس دي بلدي واللهي
ودا الطين اللي فيه أمي
قالولي سفيه كمان تكدب ،
وتحلم ذينا وتطلب .
بتتجرأ على الأسياد ،
لازم ياكلب تتأدب .
وفرضوا حراسه على عيني ،
على همسي ،
على نفسي ،
ع الأيام تعدي عليَّا ماتجيني .
زمن عدى ملوش أول
واللا آخر .
دا مات صبحه وفاض ليله ،
على المسجون وأهو صابر .
وأنا الأعمى يشيب صبري
وعمري بحاله شقفة ليل .
أنا ياحزن مش قادر
وف حكايتي تشيب مواويل .
تتوه إنته وأنا مسجون
وسجاني محنش مره ونسيني .
دفنِّي وفكره موتني
ومين هوَّه عشان يقدر يواريني.
دا طين الأرض يعرفني
وميتها بتحييني .
هيجي الموت ويلحدني
ويلحد ذيي سجاني .
أنا الواحد ،
وأنا الاتنين ،
وأنا الناس اللي مش عايشين .
.....
معز ،08/12/13