مجموعة نصوص قصيره جدا

1-
و انا نازل المعركة
مربوط و متكبل
ما كانش ممكن انتصر
اكمني ....
مربوط و متكبل
2-
امبارح
ابويا اتصل بيا بالتليفون
قالي تعالي
افتح لي باب القبر
الرطوبة
عالية علي الآخر
و لأني خفت
لا بويا يقل عقله و يعملها
و ييجي يعيش ويانا
من بعد ما شمينا نفسنا
علي الآخر
قلت له
ضيعت المفتاح

3-
( والشعراء يتبعهم الغاوون )
و انا ...
وما حدش عايز
يمشي ورايا

4-
الكون واسع جدا
اوسع من خرم الإبرة
اللي فـ ايد امي
و بتحاول تلضمها
بفتلة خيط مش عارفة
لكن بتحاول

5-
انا مش فرعوني
و لا فيش أي علاقة
بتربطني بفراعين الماضي
غير بس الموطن
لا اعرف انحت تماثيل
و لا ارسم نفسي
علي الجدران

6-
و انا ماشي جنب الحيط
كنت فاكر
اني متداري
و رسمت عصافير كتير
بتطير
لكن الغريبة
انها بعد الرسم
كانت
كلها بتموت

7-
زمان
كنت باكل كرملة
و غزل البنات و سمسمية
و اعشق العسلية اللي فـ عينيكي
و نبوت الغفير اللي ابوكي
ما كانش بيحبة
و اكمني زودتها
كان لازم اتعاقب
و عقابي كان
الانسولين

8-
طابور طويل
و انا
واقف في ديله
مستني دوري
اللي عمره ما بييجي
او حتي الطابور ينتهي
و الغريبة
ان السنين بتموت
و انا لسه
و اقف مكاني

9-
اول ما الحياة بتشقشق
ينبت الشارع العيال
و بتوع الزبالة و السريحة
الارصفه
تتملي بشر
يطرح ضجيج
و انا و انت
نتوه في دوامة الحياة
و نعود
و قت النهار ما يغيب
نتفاجيء بالسكون
و موت الارصفة

10-
زمان قوي
وقت ما كنت صغير
كان مصروفي بيحترمني
و يشتريلي أي طلب اطلبه
فجأه اختفي
وما رجعش تانى
و اختفت كل الحاجات
اللي كنت بحبها
و ظهرت حاجات كتيرة
لكن ...
مش علي قد سنى

11-
بيني و بينك
يا حياه
الموت
جميل.