بشويش ..

بشويش ..
مش قُولتِلِكْ إسمي المُجَنَّدْ سابقاً
لاء صَدَّقِي واسمي المُتَيَّم عاشِقَاً .
واسمي المواطن لم يكُنْ
ووصيِّتي اسمي يُسَجَّل لاحقَاً .
مصري جَدَعْ ، بس انخَدَع
وأهو كَل آفَى
م الحسرَه مات مُتَشَوِقَاً .
لحاجات كتير ، وبلد كبير
منها انحَرَم ْ ، وإدُّوه وسام
" ف الصبر كان مُتَفَوِقَاً ".
تمثال حجر ، عشان صَبَر
ونوط شجاع ،
وف احتفال وبالمناسبه لائقَاً .
وِهَلُمَّ جَرَّاً
للشهيد ، أما العبيد
اللي على قيد الحياه .
لو كلّْ واحد خَد مُنَاه
يتبقى أيه ؟
هنخصصُه
للساده يامواطن سفيه .
قُوم فِزّْ يابغل انصرف
طَقَاق حَنَكْ جَتَكِ الأرَف
وافهم بئه خليك نبيه !!
إنته المُجَنَّد سابقاً.
ومش مواطن لم تكن
إشرب بئه
داك كسر حُقَك والرئَه
ماتموت بئه
ولِك علينا نَعىّ أيه .
هَنرُدِّلَك جنسيتك
تمثال طبيعي لجِتِّتَك
مكتوب عليه
"عاش محترم وأهو مات نزيه "
أمَّا إن حلمت بعِزِّتَك
عايز تعيشلي حضرتك
تفضل مُجَنَّد سابقاً
ومش مواطن كن حريص .
بشويش وعيش ، ف الغُلب هيص
وأيه يعني لو نايم تعيس .
دا النوم سعيد ، بيجيب قلق
اسمه الكرامه بتنسرق .
يعني المشاكل والتظاهر
والفِرَق .
كُتر الكلام .
والله أطردك من عزبتي
طرد الِئَام .
ماأنته المُجَنَّد سابقاً
ومش مواطن لم تكن .
... ؟؟؟ !!!
ماأنا قولتِلِك
ياسمره جيت وحلفتلِك
أنا المُجَنَّد سابقاً
واسمي مواطن لم يكن .
قولتيلِي لاءه هَرُدِّلَكْ
كُلّْ اعتبَارَكْ وانصُرَكْ .
الله يسامحِك
كان كلام !!
الجنوبي
2010-03-21