الحلم الخرفان‏

مفتاح نسايم طل روحه ف طلعتى
فنان وفارد ف المدى
لحظة أفول.
--------------------------
يا ترى انت مين ياللى
بتنور شفافية الوسعه
ما بين سكاتى والقلم
بتنادى على ضحكة الضل
بتهادن روايح عنيك
لما عيون بلادك بتشرد.
------------------------
بلاطك بيخطى ف عيونى
بريق غربه صبح لونى
ولون الضحكه ف نسايمك
كما واحه بتتمشنق على جفونى.
-----------------------------
ولقيتنى بادور
كما طعم النور
ف بداية حلم ما هوش كامل
وبنات بتقرفص ضفايرها تحت مشنه
وتقرقض باطها رغيف بايت
وقميص راكد بيلف ف قلب عيدان البوص
والكون محبوس
كما طعم السوس
ف شناب راجل شايل فدان
وعنين وحيطان
طالعه تشفشف من بين قَزاز
ونسيم هزاز
بيخاف من لون رشاش (كليـ / شانـ / كوف)
وموجات وأطياف تقلب بركان
ورموش شرقانه ف وسط ديدان
وعريس فاير ومحاوطه قضاه
وعروسته سكاتها البرانى
كما شبه جنان
والباب الخامس ف المندل
رباله اسنان
والسنه الواقفه على الحافه
صبحت زلزال
نطرت ف بدنها النادى عيال
عماله بتصرخ ف ودانى
دمعه براسين
وبيبان بترزّع ف كيانى
زى الممسوس
وتغرد روحى على الضحكه
لحظة فوقان