بأغني .....

باغني بالقلب يتوزع نسا ورجالْ

وباغني بالقلب يتجمّع على الأهوالْ

باغني بالفلاحين وباغني بالعمالْ

باغني بالدم سايل والعَرق سيّالْ

باغني بالأرض حامل من اليالي طوالْ

باغني بالماضي شيّلني المآسي جبالْ

من قبل ما اتلقت اتلقت علىّ حبالْ

وباغني بالحاضر الصاعد مع الآمالْ

وباغني بالغد يكتر لي البنون والمالْ

باغني بالأمهات وباغني بالأطفالْ

باغني بالثوره من شهداء ومن أبطالْ

بعافية اليد لما تحطّم الأغلالْ

باغني بالمطرقة وباغني بالسندالْ

باغني بالجرح رافع صرح الاستقلالْ

وثابت الركن ما يقدر عليه زلزالْ

باغني بالشعب خدني الشعب جانبي الشعبْ

أغني في محبتك يا ابو العرب موّالْ

وان كانت الغنوه أكبر منّي خدني الشعبْ

وقال لي ما اخدكش إلا من الطريقْ الصعبْ

يا ابو العرب وادي قلبي في الحروف انصَبْ

غنى بليالي وبعيون العرب موّالْ