مادام اللعب ع المكشوف

مادام اللعب ع المكشوف
في نص الليل لقيت تليفون
بيطلبني وبيقول لي
أنا ف ورطه يا عم وحيد
وقبل ما اسيبه كالعاده
يعيد ويزيد
لقيت نفسي
باقول له: خير يا عم أمين
فقال: الخير حييجي منين
دريت باللي حصل ليا
كانت شوره ماهيش هيه
صحيت الصبح من نومي
ونايم كنت بهدومي
علي الدنيا اللي مقلوبه
عشان كام كلمة مكتوبه
وقدام ,بيتنا حتة دين عربيه
وناس ياما ومن آخر البلد جايه
ومجموعة أفنديه.. بًدَل قيمه
وكله نضارات سوده
فقلت: يجوز تكون موضه
قالولي: كلم الريس
أوام يالله
ماتفضلشي كده متيس
سألت: يا خلق ريس مين?!
في غمضة عين
لقيت واحد كتم بوذي
وناس تسأل وصابحه تقول:
جايين ياخدوا أبو جوزي
وقلت: يا باشا رسيني بلاش توهان
فقال: اسكت وإياك تنطق بحرف كمان
فقلت: يا باشا هوه سؤال
فقال لي: بطل استهبال
مش انت كتبت في الجورنال
قصيدة بشكل مش بطال
وفي الآخر طلبت تقابل الريس
فقلت لهم: يا ناس دا كلام
وتحقيقه ولا الأحلام
قالولي: حلمك اتحقق
ويالله احلق أوام دقنك
ماتشبهناش
قمر أمريكا بيصور
ومين يقدر يقول له بلاش
وشكلك يدي للإرهاب
فمتخليش حياتنا هباب

جابولي بدلة علي قدي وببيونه
وإوعي تقول لي عرفوا ازاي
دا عارفين كل شيء عنّا
لمين رحنا ومين جالنا
وفين كلنا وخدنا الشاي
خلاصة القول
مشينا لما رحنا القصر
وما تحسش بإن انت
ساعتها في مصر
دخلت منين.. طلعت منين
نزلت منين
ومين سلمني يابا لمين
كلام شرحه يا عم يطول
وإلا أوضة التفتيش
نظام دقي وزيه مفيش
معدات إيه.. أشعات إيه
ومروا بيها م الببيونه لمداسي
بقيت خايف
يخشوا يفتشوا راسي
وع الشاشة
ألاقي صوره بالألوان لإحساسي
***
وبعد الفحص والتدقيق
لقيت نفسي كده قاعد
مع واحد
لوا يمشي ويمشي فريق
وبعد شويه كلمني
باقول لك إيه يا عم أمين
تكونش انت والأضيشك
مفكر إننا نايمين وباللي بيجري في ندواتكمو
مش داريين
ح اقولها لك بدون تزييف
ولا تحريف
جميع حركاتكو مرصوده
شتا أو صيف
وعارفين كل أصحابك
وحيد.. ناصر..
محمد جوده.. عم شفيق
والله يرحم الدكتور
محمد اللي كان ليكم
حبيب وصديق
وياما قلتو في طنيخ
وفي طنطا وميت عساس
وكفر الشيخ
وكان كل الكلام تلبيخ
وعندي كل قصايدكم
وعندي الصوره والتعليق
ومهما بيجي في تقرير مراصدكم
بنتصرف بشكل يليق
بخبره وشغلنا مدروس
كفاية الشعب متدهول
دا همه يلقي عيش وغموس
وداهمه يكفي دروس
فقولوا كل ما بدالكم
وسامعينكم وشايفنكم وسايبنكم
لغاية م البعيد منكم
يموت مفروس
وعارفين مين مشجعكم
وخليه يابا ينفعكم
ياعم أمين وعهد الله
دا لو قلتوا الكلام دا زمان
ما كان يعرف طريق جره
لكم ولا حتي الدبان
يا عم أمين
مفيش واحد حيصبح منكم مسجون
مفيش شهره
وخلي شغلكم مركون
في عربيتك يا في الكراتين
يا عم أمين
خلاصة القول ومقصودي
مفيش من تاني أبنودي
ما صدقنا اننا طفيناه
وكان سايب ولملمناه
ودينك شفته يوم لامنا?
دا لو يكتب فعن يامنه
مفيش مانع كمان يبدع
ويكتب إعلانات سمنه
وعندك نجم شوف حاله
يعيد ويزيد في كل كلام
زمان قاله
وعمر ما قال ومش هيقول
خلاص في العصر ده حاجه
مفيش حاجه
بقي كله ولا حاجه
ظبطنا كل صوت مسموع
ومش هنكرر الموضوع
وكل اللي ادعي البطولات
بقي يكتب
يا إما غناوي أو تترات
وعاوز يشتم الحكام
فممكن يشتم السادات
سألته
بعد ما قال الكلام كله:
طب الريس عايزني في إيه?
فقال لي: خلاص هتدخل له
وصدقني
مانيش عارف باعتلك ليه
***
دخلت عليه وكان مهموم
ولسه باقول له يا ريس
فقال: معلوم
يا عم أمين أنا قررت
تبقي انت رئيس وزراء
وعندك فرصه بعد يومين
هتيجي تعرض الأسماء
ماخدتش فرصه أتكلم
وواحد قال لي: قوم سلم
وبدأت تضرب الفلاشات
ساعة إيدي ماكات في إيديه
وودوني لواحد بيه
يفهمني راح اعمل إيه
وكلمني بلون تاني
لقيت السكة واخداني
وسلمني ورق مكتوب
وقال لي: كل شيء محسوب
وفيه أسماء هتبقي معاك
من الوزرا القدام بقرار
بكيفك وللا مش برضاك
دا شيء لازم للاستقرار
وفيه وزرا جداد جايين
وما تقولش بقرار من مين
وشوف انت من أصحابك
من أحبابك كمان وزيرين
فرأيك إيه?
فقلت: قصيدة مش وحشه
وفاضل منها سطرين
أقولهم لك:
من الفزعة صحيت من النوم
لقيت نفسك
علي حرف السرير عريان
وابنك جابلك القفطان
وبيقولك ما قلنالك
تنام بهدوم
يا عيب الشوم.. يا عيب الشوم
فقال: صدقني لو بحلم
هكملها كده فعلاً
لكن دا بجد مش بهزار
وأنا زي اللي مخي طار
فقلت: اسمع يا عم أمين
كلامك مش كلام عاقلين
وقدر إننا مجانين
وهنصدق فدا يابا
لا هو دوري ولا دورك
وانت الشاعر الحساس
كفاية انك تقيد نورك
توري السكة للتايهين
يا عم أمين
نصيحتي تعتذر ليهم
وعبر عنّا بالمرّه
مادام اللعب ع المكشوف
منانا نكسر الجره
ورا التزوير ورا التزييف
والانتخابات تكون حره
عشان بيجي بجد نظيف
حياتنا أصبحت مره
وفي الإصلاح غرضنا شريف
بدال ما يجيلكو من بره
بدال ما يجيلكو من بره