المــزاد ......

فُـتح المزاد
مين يشتري هذا الوطن
كدة باللي فيه
وطنٌ بديع
فيه الرضيع
ممكن يبيع
حتى أبوه
في المهد ناطق بأعلى صوت
مين يشتري هذا الوطن

********

في البيعة نيل
هادي ... جميل
على حِجره نايم شعب
لكن نوم ذليل
ميت ومحتاج للكفن
مين يشتري هذا الوطن

********
بالقسط ... كاش
متر الوطن
أرخص من المتر القماش
والدفع آجل أو بلاش
حمِّل وقبّضني التمن
مين يشتري هذا الوطن

********

ع البيعة تاخد أهرامات
فرعونها كان فرعون و مات
لكنّه ساب الفرعنة
كاتمة نفَسنا بجدعنة
صلاحية ميت مليون سنة
وصلابة تتحدى الزمن
مين يشتري هذا الوطن

********
معانا شيلة تضحيات
وطنية فينا الأغنيات
تتغنّى لو تعلبنا فات
دم الشهيد من غير تمن
مين يشتري هذا الوطن

********

مين يشتري السد المنيع
للبيع كمان متحف بديع
المترو بالركاب .... ومعاهم نفق
مين يشتري طلّة الشمس ف بلدنا
والشفق
ع البيعة شعبٌ كان فصيح
عربي صريح
لكنه من همّه رطن
مين يشتري هذا الوطن
مين يشتري هذا الوطن