الخليفة المنتظر

الخليفة المنتظر
ف احتفال البيعة في اليوم الأغر
وجّه الشكر لرعيته ع الثقة
والجميل هيعود عليهم
في السنين اللاحقة
ثم اعتذر ...
عن عهد أسلافه الغجر
الديابة التعالب
الخوازيق المقالب
اللي ساقوا الشعب زي قطعان البقر
والخليفة المختلف
سالت دموعه وارتجف
ع الغلابة الضعفانين
المحرومين المطحونين
...اللي داقوا الظلم في عهد السلف
والكلام أهو دار و لف
والخليفة أشار بكفّ
قال هنضرب بايد حديد
ع العديد من مظاهر القرف
البطالة .. التلف
الغش في العيش ... العلف
الرشاوى ... البلاوى
الوساطة .... المحسوبية
اللولبية
الرافعة رايات الرمم
اللي ماطين الذمم
واللي خالطين اللبن في الكاس بخمر
والماء بجمر
التعابين العتاولة
اللي واخدينها مقاولة
واللي جايبين للوطن
كل أصفار المحاولة
اللي ماليين الرداوي بالرغاوى والصابون
واللي فاتحين الشاشات للعرى ... دلدلة العيون
واللي ضاحكين ع الدقون
واللي عاصرين البشر زى اللمون
واللي سارقين الجيوب بالخصخصة
واللي عاطيين الشعوب البعـ ..... ـض
..... من فتافيت الطعام
صرخ الخليفة ... الهُمَام
هَزّ أرداف الكلام
الالتزام ... الالتزام
فاضلة زقة للأمام
والأمور تصبح تمام
والخليفة يميل قوامه
ترتخي أعصاب كلامه
قال لشعبه ارتاحوا ... ناموا
انتو في عصر السماحة والسماح
كل شىء هيكون متاح ...
كل شىء هيكون مباح
بكرة شمسي عليكوا تطلع ...
بكرة هيطُلّ الصباح
سقفة عالية م الحضور
اللي زغرت ....
واللى صاح
خلّص الخطبة الخليفة ...
لملم الأوراق وراح
والغلابة الضعفانين
المحرومين المطحونين
فضلوا يستنوا الصباح
فى الصباح الشمس طلعت
والخليفة كلامه ساح