العسس ............

الليل .....
في الشوارع والحوارى
ماشي على مهله
ولا حد أبداً من العسس
مرة بيتجاهله
أمشى ورا الشوارع
كل الشوارع عسس
الليل نجومه عسس
البحر موجه عسس
أتوضّا من نيلك
نيلك أصابه نجس
أهرب لفين
كل الشوارع عسس
حفلة لتكريم الشعب
لكنه مش معزوم
لأنه كان معزوم عليه
وكل واحد من الضيوف يختار على كيفه
والشعب متصنّـف صنوف
م السهل تقييفه .....
حسب الطلب
نوع ينصلب
ونوع حناجر للهتاف
وضيف خفيف
له ناس خفاف
لما يغنى .... يرقصوا
ونوع خفيف اليد
بيهزّ ف نخيلها
قلبها ......... نيلها
وف حجرهم ياخدوا الرطب
أما بقية الشعب ......
يبقوا أرانب عسس
يحفروا فى الأرض سكة
يحفروا فى العرض سكة
يعملوا من دمى دِكّة ....... ويقعدوا
كل نظرة بألف شكة
و الشوارع تبقى بحر من العسس
فرعون ....
ماعدش البحر بيخونه
ماعدش البحر يوم يضحك عليه
موسى ......... ضيعنا عصاه
أهرب لفين ........
أعيش دفين المسألة ؟
ولاّ أسوق الشيطنة ع المهبلة
ولا أصيع وأشرب كاسين
ولاّ أصبح من دراويش الحسين
ولاّ انام زى كلب الكهف
و صحابه اللى ناموا
ولاّ أصوم
فى يوم ما يخلص صيامه
ولاّ اسَكِّت قلب عطشان دقته
والقلب فى الموت ينحبس
أهرب لفين ............
كل الشوارع عسس
الليل نجومه عسس
البحر موجه عسس
أهرب لفين .........
أهرب لفين