الشاهد ..........

أقر اني شفت عند الشروق
الشمس طالعة
وأقر اني شفتها بتنزل
عند الغروب
لكن جريمة القتل ماشفتهاش

*****

سمعت إيه..
سمعت موج البحر بيزمجر
على بعد مليون ميل
وسمعت طقطقة الضفادع
من الغيطان البعيدة
لكني ماسمعتش صريخ الضحية
برغم قربي من مكان الحادث

*****

أيوه أنا شفت النجوم بالليل
وكان مابينهم نجمة حمرا بترتعش
كأن لو زاد الهوا عليها
حتنطفي
لكني ماتذكرش وجه القاتل
مع انه فات
من جنبي واتبادل معايا الكلام!

*****

كان شكله إيه..
طويل قوي وقصير
وتخين رفيع أسمراني وأشقر
لاله حدود مميزة
ولاشكل ثابت!

*****

مادام في كل قضية يلزمكم
قاتل ومقتول وشاهد
ممكن قوي
أكون أنا القاتل أو المقتول
لكن بلاش أشهد وأقول الحق!

*****

يابيه ف عرضك
ماليش أنا ف التور ولاف الطحين
طيب ..ح أقول
بس إبعدوا المخبرين!

*****

أنا شخص حالم سالم
من صغر سني
والمشي وسط الشجر
هوايتي بالليل والنهار
وأول إمبارح
قابلني واحد قال لي كلمة وطار
سألني ع الساعة وقبل ماأقوله
تركني وأتوغل في قلب الغابة
وشكله كان
يشبه شكل البيه وكيل النيابة!

*****

حاضر ..راح أخرس
أنا قلت من الأول ماشفتش حاجة
لكن بقى إنتوا اللي غصبتوا عليا
وخلتوني أقول

*****

حصلت جريمة قتل وحشية
لكن ماليش فيها ذنب
أو مسئولية
ياتقيدوها بالقضاء والقدر
ياضد مجهول
وان كنتوا عاوزين توصلوا للعدل
اللي سألني
إجعلوه مسئول!
أنا لو أفوت م المشكلة دي سليم
ح أقعد ف كوخي
وأقفل جميع البيبان
يحرم عليا السير في أي مكان
هجم الخطر ع الكون ومات الأمان
ومن علامات النهاية
إن اللي شفته قصاد عيوني بيقتل
هوه اللي بيحقق معايا!