هل ده يحصل

نفسى أغمض يوم وافتح
والقى نفسى ف أى مطرح
جايه فيه الشمس تمرح
والقمر نازل يصبح
ع الشوارع والحارات
بين كفوفه سلطانيه
يملهالى فول مقشر
لو يلاقى الفجر كشر
يزغده ف كتفه اليمين
يطلع الموال يضفر
غنوته بشعر البنات
حادى بادى هل ده يحصل
حادى بادى لو ده يحصل
كنت أقوم وافرك عنيه
كنت ألم الصهبجية
ليلة لأهل الله شويه
فته لحمه عيش ونابت
صوتنا يصبح دندنات
كنت أبوس الأرض تطرح
سنبله ومحراث ومدفع
فوق كفوف العزم يركع
صوت حيأزح م السكات
صوت يقول لليل عوافى
يلى ماشى لبكره حافى
ضحكتى فرشى ولحافى
جوه قلب المشتاقين
حلم مستنى الميعاد
حيروحوا له لو مجاشى
عمر جاى وعمر ماشى
والعمى ليه ما تعماشى
قبل ما يعم البلاد
حادى بادى هل ده يحصل
حادى بادى مش حيحصل
إلا لما الفجر يمرق
بين عروق الضلمة يبرق
يحرق العتمة اللى تخنق
صوت نبى ينوى الجهاد
تطلع الشمس العفيه
تيجى تشرب من إديه
فى الصهاريج تجرى ميه
ينتعش نبض الساعات
السكات ملعون سكاته
بل ريقه م اللى فاتوا
حقهم للأفوكاتو
صعب كان يرفع قضيه
بعد ما تهبب ومات
حادى بادى هل ده يحصل
حادى بادى آه حيحصل
لما خيط الفجر يسرح
بين شقوق الأرض يطرح
دمعنا عشق ونايات
آه تنادى الذكريات
بص يا بنى النيل نجاشى
والتاريخ على كيفه ماشى
فيه حروف ما كتبتهاشى
بين سطور ما فهمتهاشى
لو صحيح ما عرفتهاشى
روح وركب فهمات
حادى بادى لو ده يحصل
حادى بادى بكره يحصل
مش حيحصل .. لأ حيحصل
مش حيحصل .. لأ حيحصل
مش حيحصل ……..
لأ …. حيحصل