الرحاية ...........

قاعدة على الرحاية مكفية

صوت الحبوب

مغنى سواقى أناة خريفية

مين أنتى يا شابه .. يا محنيه ؟

أنا بعت عقدى .. وعقدى طوله بلاد

كسيت بجلدى الولاد ..

ايدى على الرحاية

وقلبى حب .. آنا بطحنه بأيدى

لكنه ريم البحر في بياضه ..

وجلابيتى سواد ..

ودورى يا رحاية

وتحت توب الاحزان

دورى مع الدايرين

ولمي في الغربه .. وفي الخلان

وفى الشعور البكر والمطويه

والشومه .. والكرباج .. والعكاز

دورى يا رحايه ..

( نص الكلام ده بتاعى )

والنص مش ليه ..

( أنا جبته بدراعى )

المغربيه عيون

المشربيه مغرب

فى قلبى وزنة كلام

يا ايدين يا وزانه

ينشد فوقها الحزام

وتلعبوا الزانه

والناس عيونهم كلام

وكله كلام .

( بنيه يا بنيه

فى كل ارض مشرعه وطالعه

شبه الكنيسه .. والمادنه والحريه

شبه النسيم والميه والزلعه

أرضك حلال ... للرجال )

زرت البلاد البعيده

من غير بحور أو ركوبه

وشربت نخب لقا العيون تعب

والله طريقك يا غريب .... ؟؟

الحب علشانه أموت ... وأعيش .. وأتغلب .

وشفت ناس قفاطين (1) .. على عضام

وناس بتتخفى في توب الناس

والله يا ولد الناس .. دول ناس مازرتهمش ..

* * *

(ما حد خالى من الهم

حتى قلوع المراكب

مسكين من قال يا عم

لو كان ع السرج راكب )

يا أرضى يا حبيبتى ..

بامشى فى نسيمك .. زى طير المغربيه الراجع

منهوك وشارب من دما الخطوه ...

سدرى مزارع ..

اقب فى هوه (2)

وأشب من هوه

والسر كاتمه فى سدرى من جوه

آه .. لو فاتونى العمر اتمشى

لا أمشى فى جبالك .. خضرتك .. دربك

وأعشى طيرك قبل ما أتعشى ..

آه .. لو فاتونى أدق على بابك

لا أدق وشم الحب في قلبك

وتزهر الغنيوه فى تيابك

يا أرضى .. يا حبيبتى

بتفتحى حضنك لحضنى مواسم

طواحينك الدايره لها مواسم

والعشق له مواسم .

ما هو برضه زى ولادك لمطاربد

بتملسى عليهم بيد .. وتسبلى عنيهم بايد

واللقمه فى بقنا لها كيف ومواسم

يا أرض يا حبيبتى

سامعاني يا أرضى

أنا من حدا بنتك (( قنا ))

ما الخلفه لها ريحه

ما هى برضه شبهك تمام

فى الصبر والغنا

لكن أدارى عليكى ليه والله !

(( قنا )) صبرها زهر مع الغله

أما غناها مسكراه القله

(( الحرجه )) (3) زى الميدان

والنخل زى رقايب الجدعان

وبرضه فيه سامر وفيه حكومه

وناس كمان قاسيه ومش محكومه

وفيه غفر ذى العساكر هنا

وسوق .. وقيه .. وناس سريحه .

ما الخلفه لها ريحه

ما هى برضه شبهك تمام

يا رقايب النخل اللى مش مرتاحه

العفو يا أرضى

باكره اخطى فى دروب نباحه

الناس هناك اصناف

(( حمدات )) وهواره

أشراف و (( فلاحين ))

وناس كمان مالهاش مزاج للصنف

وناس عليها الناس بتدور

دور على القاتل

دور على المقتول

يا شيخ قناوى مدد

المحمل الهزاز ماشى ولا هامو ..

يا شيخ قناوى مدد

دم الجدع على محملك لموا ..

الخيل مع الخيال بيتعارك

الميه ويا النار بتتعارك ..

الجرن .. والكيال .. بيتعارك

يا أرضى يا حبيبتى ..

ده ولد مين ده .. ؟؟

شاله ملغمط بالتراب والدم

وطاقيته طارت على جبين الخلايق هم

وصرخته سكات .

ليه الرجال حواليه بالسكات تتلم

ده ولد مين ده .. ؟

من أى كفر ودار ؟؟

(( دم الشرفا )) م الحمدات ))

(( دم الهواره ولا من الفلاحين .. ؟

لا لونه يمسح حزننا .

ولا قبيلته تهمنا

وانما الولد مات

والولد ده من أرضنا

من طلقها

من ضهرها

من حزق ليلة كحل قلقة فرشنا

يا أرضى يا حبيبتي ..

يا مادنه طالعه لفوق

ومشرعه للسما

ومولعه القناديل بالزكا والفرض ..

لا أننى كده طايله السما ..

ولا طايله حتى الأرض ...

صوتك كأنه بنت بكريه ..

لكن ما يخلاش من نحيب الموت وعتمة الفجريه ..

اسكت يا واد ..

صرتك كأنه بلاد مازرهاش نبى ..

روح املاعبك من حزين الدار ..

لفلف مع الزوار ..

يا شيخ قناوى ..

يا قبلة التايهين في بلدنا

من كل شبر أسود

لقطنا زوادنا

ونصبنا مولدنا

نزلوا الغجر ... والحلب

من الكفور والجبال

نصبوا عششهم .. والعشش صفرا ...

مولد حلال ..

اندق فيه صوت الطبول .. الصح والبطال ..

والزمارين ..

طبلة خدودهم ع الضريح مشدودة ..

حتى اللى عدت عليه شتويه مش ع البال

واللى زرع ما جناش م الدوده .

يا ألف مرحب ــ يا مرحب

مولد عليك يا قناوى وبعوده ..

جايين وخملين

والغل زى العصا نافر فى جوف أولادنا

لكن وقول توبك كتبته لمين ... ؟؟

أصحاب المولد مين ؟؟

سألت أبويا ..

وابويا صدره كإنه مكنة طحين

جوابه برضه سؤال ..

عجوز ومحنى ومتقطع الانفاس حزين

قال لى ــ يا ولدى ..

أنا زى السؤال جوال

كان ودى اخلف ولد يسندنى وخلفتك

مشيت على الشيبه برجليه وعلمتك ..

علشان تكون رد السؤال ..

وادى انت واخواتك وانا والوقت ..

زى السيجارة بتنحرق م الوقت

خونا صوابعنا

وكفينا صوامعنا

دخلنا سوق الرجال حتى الغنا بعنا

قعدوا نسانا ع الحصيره يصروا

يحكوا الوجيعه والحديث من مره

الولد قاتل الولد

بحر الدما يتمد

(( قنا )) سكوتها دبايح

والشيخ قناوى هناك لا جواب ولا رد

يا أرضى يا حبيبتى ...

علمنى شوق السؤال فى المطارح ادب

مشيت دروبك .. درب .... درب

فى كل درب نار ..

وفى كل درب تار ..

يا ترى يا ارضى

حدش مطالبك بالدما والرجال .. ؟

احنا اهينا ــ إيدينا طول رجلينا لو خلاقاتنا

عرى الحال ..

يا ترى يا أرضى ..

حدش مطالبك بالدمار والرجال ..


--------------------------------------------------------------------------------


(1) قفاطين : جمع قفطان والقفطان هو الثوب الفضفاض

(2) هوة : الحفرة البعيدة

(3) الحرجة : غيضة الشجر الملتفة