ما كانش قاصد

ما كانش قاصد بحبها بجنون
ولا كان قاصد
يدخلها بدون استئذان
زى ما قالت له بعد كده
هي كمان ما كانتش قاصده
تديله روحها الشفافة
وتتسحب بشويش
لحد ما توصل لدمه
طب ها يعمل إيه ؟؟
وهو المهزوم على طول الخط
ضيع أجمل سنوات عمرة
في انتظارها
لكن ما جاتش
وكل يوم بيحاول بيستخصر
روحها ويتصورها
حسب ما تشكلها الذاكرة
اللي بتشبه محطة قطر
بتحمل وتفرغ
و تسيب على البدن
علامات من حزن الغياب والحضور
بس المرة دي جات فعلا
سابت كل المنتظرين على الرصيف
واترمت في حضنه
طب ها يعمل إيه
وهو اللي كل يوم بيموت
مليون مرة
كان لازم يتمسك بالحياة
يمكن يعيش يوم زيادة
يسمع صوتها
ويقولها... ما كانش قاصدي
احبك .. بجد .