صك حمايه

الورقه المكتوب عليها
بخط كوفي و مزيَّله
بمليون توقيع
و أختام من كل العالم
بتؤكد أن الأمير
من نسل " الأُمرا"
و المنسوبين لملوك الصحرا
و الشُركا في فتح بلاد الله
بالسيف المغمود في جرابه
المذكورين بالجمله..
في كتب الباري ومواثيق الكتبه
والمشهورين للخلق الان
بالأمرا
وان الامير ابن الامرا
ماشي علي نهج اجداده
وان الطلقة المطاطه
اللي انغرزت في محاشمه
كانت غلطه
لان مالوش اعداء
ولا يعرف في فنون الحرب
والحرس الواقفين علي بابه
خصيان مستوردهم من بره
لحمايته من النسوان البلدي
اللي يتطلب غصب وصاله
وهو مالوش غير في الغلمان
ويموت في الفته الضاني
ويحبس بالويسكي الامريكي
جايز يدعوه في الامم المتحده
لسماع شهادته في الحرب
الدايره بسبب الطلقة
اياها
طب هيقول ايه
لما المحقق يسأله
بلكنه اجنبيه علي ودانه
وهو مالوش في اللكنات
كان فين وقت الحادثة
وليه ماحاولش يتفادي
الطلقه المطاط
هيقول كان في سابع نومه
ولا كان بيشرب ويسكي
في البرانده الخلفيه من قصره
مع غلمانه
ولا يعيط بحرقه
فيصعب عليه ويمنحه
صك الحمايه الميري
وبعدها ينام مرتاح تحت البرواز
اللي مازال بيؤكد
ان الامير من نسل الامرا