قزاز وراني لعربيه نبيتي

ها تحاول تلبس للمره التانيه قناعها
وها تروح له
وها تصحِّي الوحش الساكن جواه
من غير تمهيد
ما ها يقدرشي يفلفص منها
وهايقوم على حيله
يبوَّط فيها ويكتب سطر جديد
على صفحه اتهلكت
وها يتعمد ينسى
إنها آخر مره
مسحت بكرامته الشارع
من غير رحمه
وركبت عربيه عيونها جريئه
ولونها نبيتي
وكلب كانيش
بيطلع له لسانه بكل استهزاء
في قزازها الورَّاني
وبيفوته بحرقة دمه
كان بيسب ساعتها
ويلعن في الجامعه
اللي اتخرج منها للتلتوار
وف أخوه اللي جيوبه ملانه
ومنفوخ ع الفاضي
وف بنت الكلب
اللي بتركب عربيات في السكه
عيونها جريئه
بعد ما لعبت بيه الكوره
وقتها كان بيلم ف قلبه
اللي اتنطوَّر ع الأسفلت
وبيتفَّض عنه ألسنة الناس
وشماتة الكلب
وبيحلف لما يشوفها
لها يسوِّي بكرامتها الأرض
ويرميها ذليله
وأحقرمن كلب لسانه مدلدل
ف قزاز وراني
لعربيه
نبيتي "