صندوق روبابكيا

طعم هزيمتك
مش قد مرارة حلقي امبارح
وأنا في اللفة
شايف الدنيا ومش قادر أعاود تاني..
بتستغرب ليه
كام عُقب سيجارة اتخنقوا ف طفايتك
من ساعة ما واجهتك بحقيقتك
وإزاي لسوعت صوابعك
ونفخت عليهم نار صدرك
فاتحرقوا زيادة
ها تعلق خيبة أملك
على مين المرة دي
البنت ..؟
ابتسمت لك حبه
ودخلت قصيدتها
وقفلت جناينها عليها
قبل ما تدخلها الغربان
ويعشش فيها البوم
اللي إنت بتجري وراه دلوقتي
الوطن..؟
إلعب غيرها
ماعادش يساعك
ولا عدتش تنشد مواويل أيام الصبا
زي زمان
وأصحابك
يتمايلوا ببراءتهم حواليك
ويقولوا الله
دلوقت يعوض ربنا
على طيبة قلبك ويسهلها لك
حتى الخيط اللي مسكته
وتبت عليه بإيديك وسنانك
وقعدت تهندم فيه
بيدوب ف إيديك
نظرتك الضيقه زي ما هيه..
وبتلعب ف مساحه أضيق منها
لو تطلع براها
هاتفتح صندوق الروبابكيا
المتزوق من بره
ومن جوه صفيح بيدبَّح ف صفيح
وانت بتدخله
هاتحاول كراكيبه بكل براعة
تشل حواسك
وتسيطر على تفكيرك
وها تتحاصر بالناس الخرده
وبالدم الفاسد
والصدا والأنقاض والرابش
بس اللي أنا متأكد منه
..إنك بني آدم من دم ولحم
وإن الطبع الغلاَّب جواك
هايرجَّع دمك بسخونته
وهايصحِّي مشاعرك قبل ما تتخدَّر
وها تقدر تاخد موقف مره ف عمرك
قدام صندوق روبابكيا
مزوق من بره
ومن جوه .... "