عيون مبهورة بفنتازيا عياطك

لسه ماحرمتش برضه ؟!!
ميت مرة اقولك حاسب
وانت كأنك...
مابتتعملش من اللى جراك
كام مرة ظبتك
وانت بتعمل عملتك البايخة
حذرتك ياما :
ماتصدقش المزيكا
اللى بتتدحلب جواك
واوعى ترّقص قلبك
مع أول ضحكة ماهيش قصداك
مش عاوز تتعلم ابداً ؟!!
كام مرة أجيبك
من فوق قضبان القطر ..
ف آخر لحظة
مرمى لوحدك ...
وبتنده على اللى يحوشك
ومافيش حواليك
غير عفرة صوت غربان ...
شمتانه ف وجعك
وعيون مبهوورة بفانتازيا عياطك
وانت مفكرها بعبطك
واقفة بتتصعب على حالك
إمتى حتفهم
إن الكدبة اللى انت مصدقها
مالهاش غير رجل بتهدس روحك
والرجل التانية بتتطمن
إنك مش حتقوم لك قومة
مش اكتر من موميا
منظرها بيصعب ع الكافر
متحدد إقامتها ف باترينة إزاز
علشان السياح تتصور وياها
وتجيلها الفضائيات من آخر الدنيا وبس !!
إتنيل وافهم !!!
إن انت ماعدتش فارق
غير مع نفسك بس
مش حافضل ياما استحمل ف غباوتك
وانا شايفك ....
بتسّكن ضحكك على روحك
وبتاخد برشامتين نسيانك
وبترمى ودانك للمزيكا
وبتقعد ولا ف دماغك
على ترابيزة اللعب إياها
وناسى إن انت ف آخرالسهرة
حتشيل الليلة لوحدك
وماحدش حايكلف خاطره يبص ف وشك
غير ضحكة ماهش قصداك خالص
من نفس
ا
ل
ن
ا
س !!