ريحة الحب هـ تطلع من البرواز

حطي المناديل ..
..
والكام هدمه اللي حيلتي
وصورتك وإنت شابه
وبتضحكي
وريحة الحب هـ تطلع من البرواز
وماتنسيش ..
سيبي مساحه صغيره
يدوب علي قد .. قعده حلوه
وكبايتين شاي
وكام ديوان شعر عاميه
وإسطوانتين لفيروز وعبد الوهاب
وكشكول فاضي
علي إعتبار يعني ..
ممكن تغازلني بنت شقيه
علي شط جميل
ونقضي ليله غرام
وكلام
ماإنت عارفه .. بحب الشعر قد إيه
وبحبك قد إيه
والعمر اللي فات
وماسبش أرض إلا وزرع فيها شوك
خنق الضحكه
وحنق الفرحه
وخننق الحلم اللي مصبرنا عليها ..
دنيا
وأنا سايب مساحه للزمن يصالحني فيها
إطمني
ولو إن الخوف من بكره وارد
وهـ يضربوا سوريا / جايز
ولبنان هـ يقسموها / ممكن
والعراق هـ تضيع / إحتمال
- يعني خلاص يعني
خلااااص
غطيني وسبيني جوه عنيك أسافر
بشنطة حلم