الست فريدة اليسارية

الست فريدة اليسارية
كانت في زمان سوفيتية
علشان كان جوزها سوفيتي
***
دلوقتي بقت متخطية
كل التفاهات الفكرية
كل الأوهام الكتاكيتي
***
والحلقة بتشد الحلقة
ما الطبقة ما بقتش الطبقة
وخبيز أمها ما بقاش بيتي !
***
عقبال عندك فيه دولارات
من كردستان للعياط
بشيكات ع البند الفتافيتي
***
أنا عمري أروبة وحويطة
لابساها أوية وتحويطــه
وبكيفي بأختار برانيطـي
***
ولأني ست وسياسية
بأرفع شعاراتي الحزبية
ثورية بمزاج هلافـيــتــي
***
جت لك ع الطبطاب يا حميدة
الحالة ما بقتش فــــريــــدة
الكل بيغرف سكيتي !
***