المصرى كان فصيح

خيبته العجب عجبان منه

سنين عجاف حشت سنه

سبع تلاف داهيه تجنه

وتبهدله وتشل اديه

**

بيقولوا كان فى الشكوى فصيح

وفى النكت قارح وقبيح

اصبح يخاف من همس الريح

والعسكرى مدد ف عنيه

**

من عهد مينا لأخينا

ابو بدله ميرى مخلينا

تايهين وناسيين أسامينا

قولى اسمك ايه؟؟

**

خايف يقول يطلع مطلوب

فى القسم ياخد بالمركوب

ويموت فطيس ابن المنهوب

والحق يطلع برضه عليه!!

**

وكلنا شرح صاحبنا

متعكزين على مصايبنا

وكل فرعون يركبنا

ويسوقنا ويدلدل رجليه

**

واتارى مصر دى موروثه

مش محروسه

ملناش لا طور ولا جاموسه

ولا حتى حتة فسفوسه

واحنا اللى زارعين الكوسه

فى الموكوسه

و ياكلها البيه !!