عشوائي .......

يا مشاعر الناس الحجر
ماس كهربائي بيحرق الشرايين

ويولِّع التلج "ف" قدم رجلي

باينه الحقيقة يادوب زوال

و"الكرش" عمّال في الزيادة يمد

الخضرة واكلاها البيوت بتروح

مكتوم نَفسْهَا الأم..

روحها الجميلة .. بتندهك يا سطوح

وبتنده العُمّال.. يشيلوا الردم

ويحطّوا زرع وورد "ع"الهامش

موكب يمّر ..

موكب يضُّر

موكب يسر الناظرين

والتائهين ..

ما لهومشي دعوة بسرقة السّكة

ولا سِكّة سالكة..لحد آخرها

متاريس .. قفول .. جنازير ..

أبواب تثير الدهشة والإعجاب

جاب ياما جاب الغراب..

علمّ قابيل الدفن

سلّمت " ع" الحاضرين بنظرة عين

ونسيت اسلِّم .. "ع" اللي " ف" عينيهم بعاد

ونسيت اسلم .."ع" اللي شايلين من زمان ..

الغربة في "القربة"

عند العطش..

يستخدموا التنقيط
الصحرا ضاقت..وسعت الدنيا

كبرت آلامي.. لمْ يجد جديد

وكلامي روّح يحمل الخيبة

الجوّ .. ده ..

معمول صناعي بإيد خبيث مكّار

بيفض عُذرية الضياء

وبيزني في الأفكار

ياضجيج كسيح

ياوعيد يزيد المفسدة أضعاف

إذا لم نخاف

إذا لم نفكِّر في اللي راح يجرا

فالأحري تترد البيبان

والأحري يتشال الميزان

دا ما فيش مكان ..معصوم من العسكر

**

وزعت راسمالي .. علي الأيام

وكفرت بالفرصة

زرقا السما ..

ولا حاطه في عينيها الوساع "لينسيز"

ودا دم مين اللي سايح ..داس عليه مسرور

عشوائي تقتلنا الكروش ..

بالصدفة.. أو بالدور

عصافير شوار ع.. بتعجز تفرد الجناحين

ودا قلب مين .. مخروم وبينقّط

عصافير شوارع .. فتات الأرض بتلقّط

وتشد حبل الجوع

ولا جوع يموت..

لكن يموت النوع علي العتبة

فرّطها حبّة يا زهر

النحس ورث

واللحن وجدان الخرس

**

إلحقني باغرق في الرماد

مسلوق ومشوي الحلم ..علي فحمك

الريحة دخلت مخدع الأوغاد

كِتِر الطلب ..لحظتها علي لحمي

أكلوني" كفتة" .. "كباب"

ولا لوم عليكم معشر النخبة

الجهل بيسبب غياب

والجبن بيسبب غياب الأهل والصحبة

"والجب " بيعاني الجفاف في الريق

ناسياني خالص لحظة الفرّيق

با ادفعلِك المعلوم

وان حد من تبعك يمر

با لقاني با تأدب واقوم

من غير مايطلب..

با ضرب التعظيم سلام

سر البقاء في الخزنة باقية عليه

لا تطوله نار

ولا عُرضة للسرقة

فاضية الدواِرق .. لسه مليانة

شربوها محاسيبك في قعدة أنس

النوم لذيذ

اللوم ألم..

كرباج بيلسع روح عليل يائس

والخوف من الزحف اللي جاي
الصدمة مش بالكهربا
الصدمة ناي ..

مش لاقي نفخة هوا

بركة دعاء الأمهات .. ها تحل

بركت جمال الصحرا ..تطلب ضل

واستنفذت كل الرصيد

ولا جد أي جديد
______________________________________