و حتى الشمس كدابه

ريحِة بـُـكا ماليَة المكان
و مغلغِلة جُوَّه الحيطان
و مكـَمْكـِمَة
دى ريحتنا
و الا ريحة الوجع القديم؟
و الا دى ريحة حدّْ
مش عايز يعافـِر؟
الشمس طالعة تبـُصّ
... قامت نوَّرِت
حتى الدَّفا جاى بالصـُّدف
و ما هوش أمومة مِنَّها
القلب تاه من قبل زحمِة سِكـِّتُه
و ما فيش جروح فى الدنيا
قادرة تسـَكـِّتُه
عايش تجاهد فى الحاجات
و الوقت ...
و انت مصـَـــدَّق
انك جاى بســــرعة
من قبل ما تدخل
فى زُمرة ناس جـُداد
كان الكلام
إن البراءة مُشــــكلة
و اما التَحَمْت
صبحت شاكك
فى طلوع الشمس أصْلاً
لمبـِة نيون دى
و الا شمس مْدَغْمِسَة
لقمة بحليب
و الا بدم مْغَمِّسَــــة
شوف كم سنة اتسرقت
و لســـــاك برضُه عايش
هات لك طبيب
يتسلى فى لحمك
جـِراح
هات لك دوا
من قلب مـُـــرَّك
و اشربـُه
هات لك طريق تانى..
..ادْهَسُه
أو يدهسك
أو ذكرياتك فيه
حتاخدك..
..تِهْرِسَك
إتمدّ فوق كـَنـَبـَة سُكَاتـَك
و افتِكر
عضمك مِكَسَّـــر
و الا واجعك م الدموع؟
تعبان بطبعك ...
و الا متكدَّر
عشان ما لقيتْش صاحب؟
إيه اللى واجعك يا جدع
غير كلمتك؟
و ازاى حترجع تانى؟
مين حيفَكَّرَك؟
كُتُب الأحاديث و السـِّـــيَر
الطفل راجع بـُكره
يلبس مَرْيَله
إحساسك انك مش سَوى
أو عبقرى
تخاريف .. بتحلم تبقى يوم
صاحب طريقة
أو .... نبى