أفكار و مشاكل

على فكره
أنا عايش مع أفكارى ومشاكلى بشكل ديموقراطى
علشان كده أنا رافع بينى وبين أفكارى ومشاكلى الكلفه
وساعات أفكارى ومشاكلى ينزلوا فى الشارع
يلعبوا مع أفكار ومشاكل ناس تانيين
بس الليل لما يليّل
باطلع أنادى عليهم م الشرفه
يطلعوا يتشطفوا ويغيروا
نقعد نتعشا ونتناقش
أفكارى بناتى الحلوين
لابسين كستور
ونمش ع الخد وغمازه
ومشاكلى ولادى وشكلى وكبار فى السن
ولسه بيرضعوا بزازه
نايمين دلوقتى فى سرايرهم
وانا قاعد وحدى فى أودة السفره
مدّى لنفسى براح أتنفس
مدّى سحابتى السودا أجازه
بس يا سيدى
وانا رايق كده وملامحى كلها طيبة
جه واحد زعق جامد جامد ...
... فركش لى الترتيبة
صحّا مشاكلى وأفكارى
وقلب لى الشقه زريبه
قمت لبست هدومى وهجيت
ومشيت حاطط قلبى على رجليّه
رحت لخالتى لبيبه ... فى الأبجيه
ما لقيتش فى مدخل جنينيتها التكعيبه
ولقيتها بجلابيتها البيضا وطرحتها البيضا وكحل عينيها وقهوتها وسجايرها قاعده على المدخل بتكلم نفسها ومعلقه مفتاح البيت على رقبتها
وسمعت صريخ مجانين
وإيدين بتدق على الباب من جوه بعصبية
خفت ... ورحت لجدى عطيه ... ما لقيتهوش
رحت لجدى أبو زيد ولقيته واخد جمله ونازل ضيف على أهل جعيف يخطب عنتر على صبحيه
رحت لسعد الساعى فى بيته
ولقيت بنته حنان بتعيط
على شهدى وسعد وروحيه
رحت الشركه أقابل همت ...
سافر كندا فى الفجريه
وكمان عمك عبد المنعم مات
حتى ولو عايش ... حد بيعرف ليه عنوان
الله يرحمه كان إنسان غلبان
بيلف شوارع مصر وماسك فى إيديه الجرنان
مسكين الجرنان من غيره ... وحزين
وحزينه شوارع مصر
زيى وزى دموعى اللى فى قلب عينيّه
بس تصدق
المشى ده روَّق بالى شويه
وكمان الهوا بالليل
وحشونى ولادى
أنا راجع ليهم
وحاحاول أنيمهم
وأنام وياهم
بس الصبح إن شاء الله
حيكون لى تصرف تانى معاهم