حكاية الشمس مع ربّات البيوت

ربات البيوت صاحيين
عشان الشمس مواعداهم
حتقابل زكيّه على طرابيزة المطبخ وحتقابل فتحيّه على كنبة الصاله وفاطمه جنب المكتبه الرمادى ومنى مع القطه الرمادى وعصمت مع القطه الشيرازى ومارى فى البلكونه الورانيه وسوسن فى سوق الجيزه ورجاء على البسطه وبهيجه فى أودة النوم وروحيه وإنصاف ويسر واعتماد وليلى وكريمه فى الجناين والشبابيك والاسطح والمداخل
الشمس حتقعد معاهم كلهم
و كل واحده لوحدها
حتسمع منهم حكايات
وتاكل معاهم سندوتشات
وتشرب شاى بالبقسماط
وقهوه على السبرتايه
وتطبق ملايات وتقطّف ملوخيه وتفصّص وتقمّع وتقشّر وتنشّر فرش البيت وتخيّط شرابات
وحتعرف أخبار الأولاد
حتعد معاهم أيام فاضله على رجوع أمينه وعبد الحكيم وحسام
و حتفتكر وياهم أيام ما كان فؤاد بيطفى النور وبيتّاوب وصلاح بيدلّع ماما وينادى عليها من البلكونه وتيزه بديعه تجاوب على أسئلة الظابط بهدوء وافتخار وعامر بيقدّم لمحمد فى الابتدائيه
والتوهان والدوخه والسخونيه
والدكتور مجدى
ونجمة المغربيه وكسوفها من القمر اللى معدى
وسحابة الحب الوردى
والشجر الأحمر اللى بيخضرّ
والتمثيل الضوئى
والأفلاك
والمشوار اللى بتاخده عشان توصل للشباك
حتشيل وياهم العفار من على كراسى الصالون
حتسمع أبله فضيله
وتتناقش وياهم فى مسلسل إمبارح
الشمس جميله
حتجيلهم لابسه قميص النوم
ودراعاتها البيضا
بتقول الدنيا لسه بخير
وشعرها الناعم الأصفر الطويل
يشبه سلاسل الأحلام
وضحكتها اللى بتلعلع ... أنغام من أيام شجر الفاكهه وجنينه مش لاقيه نجيله
الشمس بتتدلع
الشمس اتلسعت لما اتدلقت كباية الشاى على وراكها
والبياعين ينادوا ع الخضار والفاكهه
وربات البيوت يضحكوا و عينيهم تدمّع
ويحطوا لها قشر بطاطس ويدهنوا لها بزيت
ربات البيوت حتتجمع من أنحاء الجمهوريه حوالين الشمس
يترجوها تبات ويّاهم
و تبات
فى سراير فوقها ناموسيات
يسهروا للفجر فى حكايات
جنبيهم سهرانه قزازة الميه والنضاره وطقم الأسنان ... والأدويه
علشان كده يا ولاد
الشمس ماهيش طالعه بكره الصبحيه