رسم ..........

أنا بارسمك خطوط خطوط
عينين و شَعْر و شفّتين
و خصلتين على الجبين
و البحر يرمى على الشطوط
ألوان بتنشع فى الورق
أزرق ... بنفسج ... فسدقى ... اسود غطيس
أمّا القمر
حطّيته جنبك مكتمل
يصبح على شمالك عريس

أنا بارسمك واحشانى فى السفر البعيد
بينى و بينك طيّارات
و ارسم دموعك جوّه سلك التليفونات
و لمّا اعود
أدوب فى ضحكة غمّازاتك فى الخدود
و ارسم فى أودتك شمعدان
و ارسم لهيب الشمع بالورق المفضّض
تتنطّط الألوان
ألقى السما فوق القماش
متلوّنه بألوان جواش
أفرح أنا
و احط شمس كبيره فى الناحيه الشمال
و زهريات الورد فى الناحيه اليمين
و سندوتش الجبنه فى ايدين العيال
و عينيكى وسط اللوحه بتقول لى ... باحبّك
تتجنّن الفرشه فى إيدى و ارسمك
على قيشانى الحمّامات
و ايديكى بترغّى الصابون فوق البدن
و الميّه تنزل فوق نهودك تشهقى
أشهق معاكى و ارسمك فوق السرير
و اطفّى نور الأوده بالقلم الرصاص