الحلم .......

ماشى فى طريق ظلمة

والنور فى كل مكان

تاهت فيه الكلمة

وأتغرب الإنسان

حسيت ف قلبى بخوف

ولقيتنى فجأة جريت

فكرت لازم أشوف

ولعت عود كبريت

وسندت على حيطة

ولسه مش شايف

وسمعت صوت ظيته

منهوك أنا .. وخايف

دققت بعينى

بان لى الطريق مليان

والخلق حوالىً

م الضلمة كالعميان

بيخبطوا ف بعضهم

ما هو أصل مش شايفين

ويدوروا ف محلهم

وم الضلام خايفين

ماتت فى إيدى النار

والضلمة تغشانى

مديت إيدى بإصرار

ولعت عود تانى

قابلت عينى عيون

وسألت فين بكره

وسمعت نوح وشجون

وندم على ذكرى

ده كان شارعنا زمان

هو الكبير فى البلد

واللى بناه فنان

بين الخلايق .. ولد

ع القمة كان فيه فنار

يهدى الخلايق ليه

للدنيا كان نوار

والدنيا دانت بيه

وف يوم جت الغربان

وعششت حواليه

وخاف أبونا - زمان

واتسمرت رجليه

غطت جناحاتها

نور الفنار بالليل

والضلمة خبتها

ويمر ليلنا طويل

ف الضلمة جانا الغول

حطلنا ميت فرمان

وسمعنا ناس بتقول

إحنا مع الغربان !

ويقلدوا الغربان

دمسوا المنابر دمس

واتلفحوا بقفطان

وسدوا عين الشمس

غاب عن عيوننا النور

واتبدلت أزمان

وإزاى عايزنا نثور

ما هو أصلنا غربان

وصرخت .. لأ ده ضلام

ف عينيكو ليكو زمان

فوقو بلاش أوهام

مانتوش من الغربان

يا أهل شارعنا

غربان زمان طارت

وف الظلام ضعنا

شمس الشموس غابت

الحل هو النور …

هو اللى يضوى البيت

ويزقزق العصفور

والقانى فجأة .. صحيت