حصان جرّ عجوز

حاجة غريبة يا أخي ‍‍
تخيل ..
كل ما تاخد خطوة جديدة
يسحبك الطريق ..
تفشل ،
تخش في الزحمة فارد صدرك
وفرحان باللي جاي
براحتك ..
انسى كل الانكساريات
والفشل اللي اترسم ف عينيك
وحاوطهم بسور عالي
مافيهوش ولا باب
تقدر تبص منه على بكرة
بكره اللي شايفه قريب قوي
وملفوف بغموض غريب
أبعد مما تتصور
وعمره ما ح يكون
أحسن من النهارده
اللي عمره ما ح يكون
أحسن من امبارح
وامبارح ليه معاك ذكريات حزينة
مش قادر تنساها
ياما حفر وقعت فيها
قمت فارد طولك وعينيك في النجوم
طيب ..
أنا ح أقولك على حاجة ومش ح تصدقني
البنت اللي كانت معايا في آداب
لسه بتتصل بيه لحد دلوقتي
بتفكرني بشقاوة زمان اللي قربت أنساها
وتسمعني كلام ما ينفعش أقوله هنا
مع إننا خلصنا الكلية من اتناشر سنة
لسه صوتها فيه لون الصبح
وطراوة الندي
يا ترى شكلها بقى إيه دلوقتي ؟؟
وعينيها ..
لسه فيهم نفس اللمعان ؟؟
أنا عديت الخمسة وتلاتين بكام شهر
وقلبي كل ما يلاقي طريق فاضي
يخش فيه
فارد صدره وفرحان باللي جاي
مع إني حاسس
إنه بقى حصان جر عجوز
بينهج كل ما يشوف بنت حلوة
ماشية وواخده الدنيا في حضنها
أنا معاك إن الجمال بيخطف الروح
لكن القلب اللي بيخش في طرق كتيرة
في نفس الوقت .. بيتعب
والحبل اللي يتشد من ناحيتين يتقطع
على العموم
أنا شايف إنه قلب عبقري
ومنفتح ع القلوب الصافية
قضيته واضحة ومقبولة
بساطه أحمدي خالص
وبيطرح ورد بلدي
لكنه بيدبل بسرعة
حاجة غريبة يا أخي !!